Uuliamit iluanaarutissat kiisami isumaqatigiissutigaat

marsip 12-at 2008 14:22

Kalaallit Nunaanni uuliamit iluanaarutissat qanoq agguarneqarnissaat Namminersorneq pillugu isumalioqatigiissitani ilaasortat akornanni piffissami sivisuumi assortuussutigineqareersorlu kiisami ullumi aalajangiullugu isumaqatigiittoqarpoq.

De konservative-t Kalaallit Nunaannut tunngatillugu oqaaseqartartuat Per Ørum Jørgensen oqarpoq taama aalajangerneq kalaallit Namminersulernissaannut alloriarnerusoq.

- Kalaallit Nunaat namminersulernissap tungaanut ingerlaarpoq, taamaalillunilu Namminersornerullutik Oqartussaqarnermiit Namminersulernermut ikaarsaariarnissaminut imminut napatissinnaasussaavoq. Tamannalu anguneqassappat piumasarineqarpoq Kalaallit Nunaata aningaasarsiornikkut aamma imminut napatissinnaasariaqarnera. Tamannarpiarluuna qularnaatsumik ineriartortinneqartariaqartoq.

- Uulia allalluunniit aningaasarsiutaaleraluarpata Danmarkip tapiissutigisartagai ilanngartariaqalissapput taamaalillunilu Kalaallit Nunaata Danmarkimut aningaasatigut pituttorsimanera milliartortinneqarsinnaalissaaq. Taamaalillunilu Kalaallit Nunaat Namminersulernerup tungaanut aqqutissaqarnerulissaaq, taama oqarpoq Per Ørum Jørgensen.

Isumaqatigiissutigineqartorli tamanna Dansk Folkepartimi ilaasortamit Søren Espersenimit qiimmaallaatigineqanngivippoq.

- Uagut tunngaviusumik akerleraarput Oliat assigisaallu Kalaallit Nunaanni nassaarineqaraluarpata Kalaallit Namminersulernissaanut taamaallaat tuttussanngortinniarneqarnerat, tassami Kalaallit Nunaat namminersuleruni taava nammineq kisimi iluanaarutissat pigisussanngussavai uagullu isumaqarpugut iluanaarutissat naalagaaffiup pigisussaagai, taama oqarpoq Søren Espersen.