Uuliamik ujaasinissartik siuartippaat
Nunarsuatsinni aningaasatigut ajalusoornerup kikkut tamaasa eqqarsartileraluarpai nunatsinni uuliasiorniartut aatsitassanillu piiaaniartut tunuartitissasut. Tamannali tupaallannartumik killormut sunniuteqalerpoq, Skotlandimiut uuliasiorfiat Cairn Energy ukiumik ataatsimik sioqqullugu qillerinialerami.
Hans Kristian Olsen:
- Maannakkut soorlu Diskop sioraani uuliamik ujarlerneq eqqarsaatigalugu siuariarnerujussuussaaq taamatut qillerinerit aallartippata, Nunaoilip pisortaa Hans Kristian Olsen oqarpoq.
Taanna oqarpoq qillerinerit marluk nalinginnaasumik 550 millionit koruuninik akeqartussaagaluartut, atortut atugassat akikillinerisigut akikinnerujussuanngortussaasut:
- Maannakkut tamakkua qillerutit imaluunniit umiarsuit qilleriffiit ima akikillitigisimappata maannakkut tassa naatsorsorsimallugu 330 millionit missaanni taamatut qillerineq naleqarsinnaasoq siuartikkunikku.
Taamaalilluni 230 millionit koruunit sipaarutigalugit ukiup tulliani uuliamik qillerut umiarsuaq nunatsinnukartussanngorpoq.
- Aamma ukua uuliasioqatigiiffiit allat maannakkut Qeqertarsuup sioraani ujarlersut taamaalillutik immaqa aaliangerniartussaassaalissagamik ilaaqqunnissaminnik – (tassami umiarsuaq soorlu kalaallit nunaannukartinnera aammalu qillerereerunik aamma uterteqqinnera) – taamatut ilaa attartornera akisoorujussuusarami taamaalilluni ukua allanik aamma suleqateqarlutik soorlu qillerinerit arlallit taava ingerlanneqarsinnaalissagamik. Hans Kristian Olsen oqarpoq.
Taanna oqarpoq, naatsorsuutigineqassanngitsoq Cairn Energy qillerinerni siullerni marlunni uuliamik nassaarsinnaassasoq, paasissutissalli pissarsiassat annertuut siunissamut iluaqutaassaqisut oqaatigaa.
