Uuliamik ujaasineq isertitaqarfiulluarpoq

- Qaammatit sisamat ingerlaneranni aningaasat kaaviiaartitat 10-12 millionit koruuninik amerleriarput, Qaasuitsup kommuniani imaani uuliamik ujaasilluni qillerinermi ataqatigiissaarisoq Hans Peder Barlach Christensen oqarpoq.

- Cairn Energyp maaniinnerata taamak annertutigisumik uagutsinnut sunniuteqarsinnaanera, arlaannattaluunniit ilimagisimanngilaa. Tamatuma taama sunniuteqartiginera, tamatsinnut tupaallatsitsivoq, Hans Peder Barlach Christensen, Royal Arctic Linep nittartagaanut taama oqarpoq.

Cairn Energyp qillerinera ilaatigut Aasianni mittarfimmut ulapaartitsisimaqaaq, tassami sulisut 150-it 180-illu akornanniittut, sapaatit akunneri tamaasa qilleriviup Aasiaallu akornanni angallanneqartarmata.

- Aalisartut piniartullu qillerisunut aalisakkanik tuttunillu aamma tunisaqarluarsimapput, aamma Sømandshjemmi 500-nik amerlanerusunik unnuiffigineqarsimavoq, qillerisoqarneratalu nalaani ulikkaaqqaannangajalluni, Barlach Christensen oqarpoq.

Uuliasiorluni qillerisoqarnerata kinguneranik, tusagassiortorpassuit nunani tamalaaneersut aamma tikerarput.

- Aasianni nunarsuarmioqataanerput misigilluaripput oqartoqarsinnaavoq. Tamanna inuusuttunut pitsaasuuvoq, nalunngilaralu ilaat imaani uuliasiornermut tunngasunik ilinniagaqarusuttut pisunullu peqataarusullutik, Barlach Christensen Royal Arctic Linep nittartagaanut taama oqarpoq.