Uuliamik tunisassiorneq annerulersinniarneqarpoq
Ilaatigut USA-p nunat uuliamik tunisassiortut peqatigiiffiat kajumissaarpaa uuliamik annertunerusumik qalluisoqalernissaa isumageqqullugu, taamaalilluni uuliamik pisariaqartitsisut pissaqarniassammata aamma uuliap akia killilersimaarneqarniassammat. Tassami sapaatip akunnerisa marluk matuma siornagut uulia nappartamut 100 dollaringajannik akeqalermat.
Ippassaq tusatsiakkat aamma ilagaat nunat OPEC-imut ilaasortaasut, ataatsimut katillugit nunarsuarmi uuliamik tunisassiornerup 40 procentianik tunisassiortuusut, nappartat ullormut tunisassiarisartakkatik 500.000-inik amerliniaraat. Tamanna pissutigalugu uuliap akia ippassaq appartinneqarpoq.
Taamaattorli OPEC-imut ilaasortat ilaasa nutaarsiassaqartitsivimmut Reuters-imut oqaatigaat, uuliamik tunisassiortut tunisassiatik amerlinianngikkaat. Nunat OPEC-imut ilaasortaasut ministeriisa arlallit siusinnerusukkut oqaatigaat, ukiuuneranut naammattumik uuliamik tunisassiassaqartoq, uuliallu akiata qaffasinneranut uuliassaaleqineq pissutaanani iluanaarniat pisuusut.
