Uuliamik qillerivik suli nalorninartoqarpoq

Maannamut ajutoornermit annerusumik ajutoornersuaqarsinnaavoq.

Tassami immikkut ilisimasallit oqaatigaat, qillerivik uuliamik suli aniatitsillattaasoq. Immamuunngitsoq, immalli naqqata ikeranut suli maqisoqarnerarlugu.

Norgimiu immikkut ilisimasalik, kinaassutsiminik isertuusserusuttoq aviisimut Teknisk Ukebladimut taama oqarpoq.

- Cementi qilleriffimmut simitsissutigineqartoq uuliakoornermik unitsitsissutigissallugu naammassimanngitsoq ilimanarsivoq, immikkut ilisimasalik oqarpoq.

- Taamaattoqassappat ajutoorneq maannakkumit annertunerujussuaq ilimagisinnaassavarput, immikkut ilisimasalik kinaassutsiminik isertuussisoq, taama oqarpoq.

Nunap iluanut uuliamik seerisoqarnissaa ilimanartoq, Acona Wellpro-mi, Norgimi qillerinermik puilasulerinermillu suliaqartut annersaanni pisortap oqaatigaa.

Nunap iluanut uuliamik seerisoqassappat, tamatuma immamut seernissaa nalorninartoqartoq, suliffeqarfiup pisortaa Thorleif Lager oqarpoq.

- Immaqa uulia seerisoq tamarmi nunap iluaniiginnarsinnaassaaq, suliffeqarfiup pisortaa nittartakkamut ingeniøren.dk-mut taama oqarpoq.