Uuliamik pilersuinermut aqqutit aserfallassimaqaat

septembarip 06-at 2006 10:40

Alaskap avannaani uuliamik pilersuinermi aqqutit ruujorersuit ilimagisamit aserfallannerusimasut paasineqarpoq.

Uuliasioqatigiiffiup BP-p sakkortuumik pisuutinneqarnera pisortatigoortumik ippassaq saqqummiunneqarpoq.

Uuliamik pilersuinermi aqqutit ruujorersuit misissorneqarnerini, misissuisut Alaskameersut peqatigalugit paasissutissanik toqqorterisimasutut uuliaatilissuaq BP pisuutinneqartoq, nutaarsiassaqartitsivik Dow Jones Newswire allaatiginnippoq.

Alaskami uuliamik pilersuinermi aqqutit misissorneqarnerinut atatillugu, Amerikami kongres-ip tusarniaanera aallartittorlu, pisuutitsinerit aallartipput.

Uuliamik pilersuinermi BP-p ruujorit atugai ajornartorsiorfiusarput, marsillu qaammataani ruujorit ilaat putummat, uulia annertooq pinngortitamut kuuppoq. Taamani uuliap kuussimanera ajutoornertut annertunngitsutut BP-mit oqaatigineqarpoq.

Aggustimili paasineqarpoq ruujorit ilimagisamit amerlanerit ajoquteqartut, uuliamillu pilersuineq matugallarneqaqqaariarluni, uuliamik pilersuineq affaannarsortumik ingerlanneqalerpoq.