Uuliamik nassaanngillat
Tuluit uuliasioqatigiiffissuata BP-p Savalimmiut kujataani kangiani qaammatit tallimat qillerigaluarnera iluatsitsiviunngitsoortoq nalunaarutigineqarpoq.
Allattoq Elisa Isaksen
apriilip 04-at 2008 17:36
Naallu uuliasioqatigiiffiit pingasoqqiit BP, Shell Anadarkolu milliardip affaanik nalilimmik qillerisimagaluartik susaavissorput.
Silapiloqattaarnera, immallu naqqata qillernerani piuminaalliornerit ajornartorsiutaasimaqaat.
Taamaalilluni uuliasioqatigiiffissuit assigiinngitsut arfinilissaat Savalimmiut imartaani uuliaajunnartumik nassaanngitsuuinnaqaat, naak qanittuani Tuluit Nunaata imartaani uuliamik qalluisorsuugaluartut.
Uuliasiorfiilli anusinngoratik aasaru misileeqqinniarput, tamatumuunakkut Italiamiut uuliasiortitseqatigiiffiat ENI qilleriniarpoq.
Savalimmiuni naalakkersuisut qillerinissanut akuersissutinik agguaasseqqammerput, ukiarulu suli qillerisussarsiortoqaqqissalluni.
