Uuliamik mingutsitsisoqassagaluarpat sillimaniarneq nunat tamalaat akisussaaffigaat

Ullumi Inatsisartut ataatsimiittarfianni Nunanut allanut tunngasutigut naalakkersuinikkut ingerlatsineq pillugu nassuiaatip oqallisigineqarneqarnerani eqqartorneqarpoq Kalaallit Nunaata imartaani uuliamik, Mexicop kangerliumanersuani mingutsitsinermut assingusumik Kalaallit Nunaata imartaani mingutsitsisoqassagaluarpat tamanna piareersimaffigineqarnersoq.

- Allatut ajornaqaaq, nunatsinni imartatsinnilu assingusumik ajunaarnersuaqarsinnaaneranut piumasaqaatit annertunerpaasariaqarput. Tamanna qulakkeerneqarsinnaanngippat, Atassummiit uagut piareersimavugut uuliasiorniarluni nunatsinni nuttalu qanitaani suliniutit tamarmik unitsinneqarsinnaanissaannut, tamanna aamma piareersimaffigaarput aningaasarsiornikkut iluaqutissaasinnaasut nalunngikkalauarlutigit.

Taama oqarpoq Atassutip Inatsisartuni politikkikkut oqaaseqartartua, Knud Kristiansen ullumi Nunanut allanut tunngasutigut naalakkersuinikkut ingerlatsineq pillugu nassuiaatip oqallisigineqarneqarnerani.

Taama oqarneq Naalakkersuisut siulitaasuannut, Kuupik Kleistimut, Inuit Ataqatigiit siulittaasuannut nutaarluinnaavoq.

- Tassami nutaarsiassaavoq. Isumaqarpunga Atassutip Inatsisartut ataatsimiinnerisa ulluani kingullermi taamatut isummersimanera nutaarsiassaasoq. Qanorpiaq isummersussanerlunga imaluunniit allatut isumalersussanerlugu massakkorpiaq naluara. Atassutip isummersortarnera eqqarsaatigalugu isumaqarpunga allangortitsinerusoq politikkimik, Kuupik Kleist oqarpoq.

Ataatsimeereernerup kingorna Knud Kristiansenip misileraalluni immap naqqani uuliasiorluni qillerisoqarnissaanik unitsitsinissamik oqarnini sakkukillivaa.

- Tassa soorunami taamanikkussamut isummerumaarpugut, taamaammallu oqarpugut Naalakkersuisut arpannerusariaqartut taavalu Kanukoka suleqatigalugu arlaannik aaqqiissuteqartariaqartut. Tassa uagut Atassummiik tamanna oqariartuutigaarput, Knud Kristiansen oqarpoq.

Sillimanineq pillugu inatsit akuersissutigineqaqqammerpoq piffissamilu aggersumi kommuuninut atortut suut pisariaqartinneqarnersut pillugu isumaqatiginninniutigineqassalluni nalimmassarneqarlunilu.

Sillimaniarneq pilersaarutigineqartutut Kalaallit Nunaata sineriaani uuliamik mingutsitsisoqalissagaluarpat atorneqartussaavoq.

Kuupik Kleist oqarpoq Issittumi Siunnersuisoqatigiit Kalaallit Nunaanni sillimaniarnermut ineriartortitseqqinnissamut atorneqarsinnaasut.