Uuliamik maqisoortoqassagaluarpat nunarput eqqorneqariaannaavoq
Tamanna immami itisuumi uuliamik maqisoortoqassagaluarpat ajornerpaamik pisoqarsinnaaneranik naatsorsuinerni takuneqarsinnaavoq, tassami tuluit naalakkersuisuisa uuliasiortitseqatigiiffik Chevron tamaani oktobarimili qillerinissamut akuersissuteqarfigisimammassuk.
Uuliamik maqisoortoqassagaluarpat iliuusissatut pilersaarut tuluit aviisiannit The Guardianimit misissoqqissaarneqarsimavoq. Paasissutissallu Chevronip tuluillu naalakkersuisuisa akornanni internetikkut attaveqaqatigiinnerni, aviisimit pissarsiarineqarsimasunit tamakku paasineqarput.
Immami itisuumi qillerinerni aallartinneqareersuni maqisoortoqassagaluarpat, annerusumik Skotland aamma Tuluit Nunaata Kangia eqqugaassapput, uulialu maqisoq immap sarfaanit Nunatsinnut anngunneqassasoq, qarasaasiakkut nalunaarutini Chevronimit oqaatigineqarpoq.
Mexicop Kangerliumanersuani immami itisuumi uuliasiornikkut ajutoortoqarnerata kingornagut, uuliasiortitseqatigiiffik Chevron immami itisuumi qillerinissamut siullersaalluni akuerineqarpoq. Taamatut aalajangiineq avatangiisinik illersuiniaqatigiiffiup Greenpeacep oqaasiinartigut iliuuseqarnermigullu isornartorsioreerpaa. Iliuuserisaat Qeqertarsuup kitaani Greenpeacep aasaq iliuusaanut assinnguvoq.
Tamatuma peqatigisaanik Greenpeacep tuluit naalakkersuisui eqqartuussivimmut suliassanngortippai, tamatumunngalu tunngavilersuutigaat USA-p sineriaani ajutoorneq suli iluamik paasineqanngitsoq, immami itisuumi qillerinissamut akuersissuteqarneq akisussaassuseqanngitsumik iliornerunerarlugu.
