Uuliamik maqisoortoqassagaluarpat Cairn akisussaavoq

Uuliasiornermi Nunatta sillimaniaernmut pilersaarutaa, Greenpeace-kkunnut tunniunneqarusunngitsoq, susassaqarfinnit arfineq marlunnit takuneqareerluni ilisimaneqalereerpoq. Folketingimut ilaasortap Enhedslisten-imeersup, Per Clausenip apeqqutaata Avantangiisit pillugit ministerip, Karen Ellemanip akissutaani tamanna erserpoq.
Allattoq Apollo Jeremiassen
juulip 29-at 2011 08:29

Karen Ellemanip nalunaarutigaa, ajutoortoqarnissaa ajunaarnersuaqqarnissaalu eqqarsaatigalugit, ikiuiniarnermi sillimanissamut ataatsimiititaliamik Naalakkersuisut pilersitsereersut.

Ataatsimiititaliaq ilaasortarai Nunatsinni Oqartussaqarfinneersut, taakkununnga ilaallutik Aatsitassat pillugit oqartussaqarfik, Peqqissutsimut oqartussaqarfik, Qatserisartoqarfik aamma Namminersorlutik Oqartussat tusagassiortui. Aaammattaq ilaasortaatitaqarput Kalaallit Nunaanni Politimestereqarfik Kangilinnguanilu Sakkutooqarfik. Taakkua saniatigut Cairn Energymit aallartitaq, sillimaniarneq eqqarsaatigalugu oqallittoqaraagat aggersarneqartarluni.

Folketingimut ilaasortap Per Clausenip aammattaaq paaserusuppaa, Danmark qanoq pisussaaffeqarnersoq uuliamik maqisoortoqassagaluarpat, Cairn Energyllu pisussaaffini iluatsissanngikkaluarpagu.

Apeqqummut tamassumunnga Karen Ellemann akivoq, uuliamik mingutsitsisoqassagaluarpat, Aatsitassat pillugit Oqartussaqarfiup Cairn Energy aningaasanik sillimmasiisissimagaa, mingutsitsinerup kingorna saliinermut atugassanik.

Aningaasat sillimmasiinermi akiliutigineqartut naammanngippata, uuliasiortunit aningaasartuutaassasut, Avatangiisit pillugit ministeri Karen Ellemann akivoq. Taassumalu innersuutigalugu Nunatsinni immami pinngortitaq pillugu danskit inatsisaat atuummat, tassalu ajutoornermut akisussaasoq akiliisinneqassasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq