Uuliamik amigaateqalertoqarataannaavoq

Ukiut tulliuttut tallimat iluanni uuliasiorneq ajornartorsiulerfiusinnaavoq aningaasarsiornerullu ajornartorsiortitsinerata qaangeriartorneranut tamanna akornutaasinnaavoq nukissiuuteqarneq pillugu suliniaqatigiiffiup pisortaa tuluit aviisiinut oqarpoq.

Uuliap nunarsuarmi qallorneqartup ukiut qulit tulliuttut ingerlaneranni annerpaaffissani tikissavaa tamannali naatsorsuutigineqarsimasumit ukiunik qulinik siusinneruvoq. Tamannalu peqatigitillugu Kina Indialu uuliamik atuineruleriartorput. Uuliallu akia taamaammat ukiut ikittunnguit ingerlanerini qaffariapiloorumaartoq aningaasarsiornerullu ineriartorneranik innarliiumaartoq nukissiuuteqarnermik suliniaqatigiiffiup ilimagaa. Ernumaneq tamanna nukissiuuteqarnermik misissuisarfimmi pisortap Jørgen Abildgaardip ilalerpaa:

- Uuliap akiata qaffannera siusinnerusukkut qaffattarnerminit annerorataannaavoq, uuliallu akia ima qaffasitsigilersinnaavoq allaat aningasarsiornerup qaffariartorneranik unikaallatsitsisinnaalluni, Jørgen Abildgaard oqarpoq.

Nukissiuuteqarneq pillugu suliniaqatigiiffiup uuliasiorfiit 800-it qalluinerat misissorsimavaa. Misissuinerup takutippaa uulia qallorneqartoq annertunerpaaffissaminiittoq ukiullu marluinnaat matuma siorna ilimagineqartumiit sinneruttoq mikinerungaartoq.

Uuliasiorfissanik nutaanik ujaasinerup pisariaqartinneqartoq matussusersinnaassaneraa apeqqutaaginnalerpoq, tamannalumi qularutigineqarpoq. Imaanngitsoq nunap iluani uuliaarutilermat, kisianni uulia pissarsiarineqarsinnaasoq tikikkuminaatsumiimmat soorlu issittup nunataani, Jørgen Abildgaard oqarpoq.

- Uulia tikikkuminaatsumiiginnarnani nunami eriagisariaqartumiippoq. Taamaammallu uuliasiussagaanni aningaasarpassuit atortariaqassapput.