Uuliakoortoqarsinnaanera nalornissutigineqarpoq

ICC-p siulittaasua Aqqaluk Lynge oqaluttuarpoq paasissutissanik pisortanit pissarsiniarneq pisariullunilu piffisatornartupilussuusimasoq.

- Eqqaasinnaasama ilagaat uuliamik qilleriviit ilulissanut tunngatillugu iliuusissaat pillugit nalunaarusiaq. Pappiaqqat kiisami pissarsiarigatsigit, titartuiffigineqangaatsiarsimapput, tamannalu pissutigalugu peqqissutsimut, isumannaallisaanermut avatangiisinullu sillimaniarnikkut piareersaatit pissusissamisoornersut naliliiffigisinnaasimanngilagut.

Aqqaluk Lynge paasissutissat suut tunniunneqannginnissaannut suullu tunniunneqarnissaannut tunaartarisassanik ersarissunik ujartuivoq.

- Paasissutissanik tunniussiumannginneq pillugu nassuiaasoqartariaqarsoraarput, aamma paasissutissat taamaattut sooq tunniunneqarusunnginnerinut ersarissunik tunaartarisassaqartariaqarsoraarput.

Pissutsit maannakkutut isikkoqartillugit paasissutissanik amigartunik tunniussisoqarsimaneratigut, ICC-p siulittaasuata isumannaallisaanerup pissusissamisoornera qularnaveqqusersinnaanngilaa, tamannalu pissutigalugu isumannaallisaaneq pissusissimasuunngeratarsinnaavoq.

- Blow up-ertoqassagaluarpat, tamatuma pinngitsoortinnissaanut isumannaallisaaneq annikitsuararsuuvoq, Aqqaluk Lynge oqarpoq.

Jens-Erik Kirkegaardip akisussaaffeqarfimmut naalakkersuisunngorlaatut ICC-p nalunaarusiaa ilassilluarpaa.

- Nalunaarusiamik paasissutissiilluartumik tunineqarpugut, aamma ICC ippassaq pitsaasumik angusaqarfiulluartumillu ataatsimeeqatigaarput.

Jens-Erik Kirkegaardip isumannaallisaanermut tunngatillugu ajornartorsiuteqarsorinngilaa, ammanerusumillu ingerlatsisoqarsinnaanera miserratiginagu.

- Teknikkikkut piareersaatigineqartut pitsaasuusoraakka, aamma upalungaarsimaniarnissamut pilersaaruteqarnikkut Cairn Energyp ajornerpaarpaamik pisoqassagaluarpat iliuusissatut naatsorsuutigisaa qaangerlugu uuliakoornermik suli annerusumik pisoqassagaluarpat tamatuma isumaginissaanut piareersaateqarpoq. Paasissutissalli amigarineqarnerat isumaqatigaa.

Jens Erik Kirkegaardip killilimmik paasissutissanik tunniusissoqarnera politikkimut tunnganerarpaa teknnikkimullu tunngannginnerarlugu.

- Isumaqarpunga atorfilittatigoortumik teknikkimullu tunngasunik paasissutissarpassuarnik tunniussisoqarsimasoq.

Naalakkersuisunngorlaap suliamik naliliinera isumannaallisaanikkut amigartoqarneranik imaqarani ammanerusumik ingerlatsisoqarnissaanik imaqarneruvoq.

- Upalungaarsimaniarneq pitsaalluinnartuuvoq, naalakkersuisutigoortumilli paasissutissiinerup amigarnera isumaqatigaara.