Uuliakoortoqarnissaa Inuvialuit ernumagaat

Beaufortip Imartaani uuliasiorluni qillerisoqassanersoq pillugu Issittup kippasissortaani Inuialuit, Regional Corporation uuliasiortitseqatigiillu assigiinngitsut sapaatip-akunnerata uuma ingerlanerani arlaleriarlutik oqallipput.

Mexicop Kangerliumanersuani ajunaarnersuaqarnerata kingorna tamaani uuliasiortoqarnissaa Inuialuit ernumanartoqartittorujussuaat.

Canadami naalagaaffiup nukissiuuteqarnermut allaffeqarfia ataatsimiinnerni aqutsisuuvoq.

Uuliasiortitseqatigiiffiit arlallit ataatsimeeqataapput, soorlu Imperial Oil, Conoco-Phillips, Chevron, aamma Canadami uuliasiortitseqatigiiffiit kattuffii.

Aviisimi Globe and Mailimi allaaserineqartut naapertorlugit, uuliasiortitseqatigiit oqarput, uuliakoortoqassagaluarpat taarsiinissamut killeqanngitsumik akisussaaffeqarnissartik akuerisinnaallugu, misissuilersinnatilli aamma qillerilersinnatik aningaasanik qularnaveeqqutissaminnik toqqorserusunnatik.

Nordvest-Territoriami pisortaasimasoq, maannalu Inuialuit Regional Corporationimi pisortaasoq, Nellie Cournoyea, oqarpoq, uuliakoornissaq pinaveersaarniarlugu, uuliakoortoqassagaluarpallu uuliasiortitseqatigiiffiit saliinissaminnut qanoq pisinnaasaqartiginersut, annerusumillu isumannaallisaavigineqarnissartik Inuialuit massakkut pisariaqartikkaat.

- Mexicop Kangerliumanersuani ajunaarnersuaqarneratut ittumik pisoqarnissaa kissaatigivallaanngilaat, Beaufortip Imartaa maanna mingueqisoq mingutsinneqaqinammat, Nellie Cournoyea oqarpoq.

Inuialuit uuliasiortitseqatigiiffiillu isumaqatigiinniarneri  nangeqqittussaapput.