Uuliakoortoqarnerani saliisussat: Upalungaarsimaneq pitsaanerulissaaq

Greenland Oil Spill Response, Namminersorlutik Oqartussaniit pigineqartoq nunarsuarmi uuliakoornissamut upalungaarsimanermut kattuffiit annersaannut, Oil Spill Response Limitedimut, tuluit nunaanniittumut, suleqatigiinnissamut isumaqatigiissut ippassaq atsiorpaa.
Allattoq Dorthea Johansen
juunip 18-at 2014 07:12

Isumaqatigiissummik atsiornermi siunertaavoq, Kalaallit Nunaanni sullissinerup pitsaanerpaajutinnissaannut suleqatigiit marluk taakkua akornanni suleqatigiinnerup nukittorsarneqarnissaa.
 
- Uuliakoornissamut upalungaarsimanermut kattuffik suleqatigisassarput misilittagaqarluartuuvoq, Greenland Oil Spill Response pisortaaneq Lonnie Wilms oqarpoq.

Uuliakoornissamut upalungaarsimanermut suleqatigiinnissamik isumaqatigiissuteqartut

Suleqatigiit akornanni piginnaasat misilittakkallu paarlaasseqatigiissutigisassavaat, taamaaliornikkut ingerlatseqatigiiffiit piginnaasaat ataatsimoorussamik ikioqatigiilluni anguneqassaaq.
 
Suleqatigiinnermut ataatsimoorussanik sinaakkutissiinikkut aammalu uuliakoornissamut upalungaarsimanermut isumalluutinullu aporfeqanngitsumik marluk taakku akornanni ingerlanneqartumik pilersaarusiornikkut pissaaq.
 
Taava nunatsinni uuliakoortoqassagaluarpat sillimanissamut nukittunerussallutik.
 
- Uuliakoornernik annertuumik pisoqassagaluarpat, saliineq pitsaanerpaaq atorneqarsinnaalissaaq, Lonnie Wilms oqarpoq.
 
Isumaqatigiissummik atsioqatigineqartoq aamma isumalluarpoq.
 
- Greenland Oil Spill Response peqatigalugu uuliakoornissamut upalungaarsimanermi atugassatta annertusinissaat aammalu qanoq ililluta sapinngisamik pitsaanerpaamik Kalaallit Nunaanni uuliakoornissamut upalungaarsimanermik ataqatigiissaakkamik sunniuteqarluartumillu pilersuisinnaassanerluta misissornissaa qilanaaraarput.
Suleqatigiinnerulerneq iluaqutaassaaq aammalu suliffissuit pitsaanerusumik suleqatigiinnissaannut tunngavisseeqataassalluni, Oil Spill Response Limitedimi pisortaaneq Robert Limb oqarpoq.
 
Greenland Oil Spill Response 2012-imi pilersinneqarpoq aammalu 100 procentimik Namminersorlutik Oqartussanit pigineqarluni. Uuliamik mingutsitsinissamut upalungaarsimanermut, uuliamik mingutsitsinerup kingorna avatangiisini saliinermut allatullu Kalaallit Nunaanni aatsitassanut suliassaqarfiup iluani assigusumik suliaqarnermut tunngatillugu niuernermik tunngaveqartumik suliaqarnermik ingerlatsisuuvoq
 
Lonnie Wilmsip erseqqissaatigaa isumaqatigiissummi isumaqatigiissutigineqatumi ilaanngimmat Kalaallit Nunaat aningaasartuuteqassasoq. Isumaqatigiissullu atsiorneqartoq  misilittakkanik paarlaasseqatigiinnissamut isumaqatigiissutaanerusoq.
 
Greenland Oil Spill Response uuliakoornissamut silimaniarnermut atugassanik arlalinnik atortorissaaruteqarpoq. Soorlu uuliakoornermi immami assiaqutigineqartartut puttasut 12 kilometerinik takitigusunik peqarput. Uuliakoornernillu milluaartinik aamma peqarlutik.