Uuliakoornissamut upalungaarsimanermut suleqatigiinnissamik isumaqatigiissuteqartut
Suleqatigiinnissamik isumaqatigiissuteqarnikkut, Memorandum of Understandingimik taaneqartukkut, Greenland Oil Spill Responsep Oil Spill Response Limitedillu suleqatigiinnerat nukittorsarniarneqarpoq, Nunatsinni uuliakoortoqassagaluarpat erngertumik qanoq-iliuuseqarnissaq pillugu peqatigiillutik pilersaarusiorsinnaanngorlugit. Ingerlatseqatigiiffik tusagassiorfinnut nalunaaruteqarluni taama allappoq.
- Sullississutigisatta ingerlaavartumik inerisartuarnissaat annertusartuarnissaallu pingaaruteqartorujussuuvoq, aammalu kattuffinnit OSRL-itut ittunit misilittagaqarnerusunit ilinniagaqarluta pitsaanerusumik taamaaliorsinnaavugut, Greenland Oil Spill Responsemi pisortaq Lonnie B. Wilms, Greenland Oil Spill Responsellu ukiuni marluinnarni atuussimanera innersuussutigalugu taama oqarpoq.
- GOSR peqatigalugu uuliakoornissamut upalungaarsimanermi atugassatta annertusinissaat aammalu qanoq ililluta sapinngisamik pitsaanerpaamik Kalaallit Nunaanni uuliakoornissamut upalungaarsimanermik ataqatigiissaakkamik sunniuteqarluartumillu pilersuisinnaassanerluta misissornissaa qilanaaraarput, Oil Spill Response Limitedip pisortaa, Robert Limb, taama oqarpoq.
Greenland Oil Spill Response 2012-imi pilersinneqarpoq, Nunatsinnilu uuliasioqatigiiffinnut uuliakoortoqarnerani atortussanik akiliuteqartitsinikkut piareersimasuutitaqarluni.
