Uuliakoorneq pillugu innuttaasunik ataatsimiititsilersut
![](/sites/default/files/styles/image_934x467/public/article_images/olieudslip2_02.jpg?itok=hGlPBnW8)
Pinngortitaq pillugu nunarsuaq tamakkerlugu suliniaqatigiiffik, WWF, Upernavimmi unnugu innuttaasunik ataatsimiititsissaaq. Sammineqartussarlu tassaavoq assersuutigalugu uuliasiornermut atatillugu imaluunniit umiarsuup takornariartaatip ikkarlinnerani uuliakoortoqartillugu tamanna qanoq kinguneqarsinnaanersoq.
Aalisarnermullu, piniarnermut pinngortitamullu kingunerisinnaasai pingaarnertut sammineqassapput.
Tamannalu suliniummi nutaami ersarissarneqarniartoq WWF tusagassiorfinnut nalunaaruteqarluni allappoq.
WWF suliniummik assingusumik siornatigut ingerlataqarsimavoq, tamatumanilu Nunavumi Beaufortip Imartaata avannaatungaani, pisinnaasut assigiinngitsut 22-t misissuiffigineqarput.
AAMMA ATUARUK VIDEO Imartatsinni uuliasiornissaq innuttaasut 75 procentiisa akerliuffigigaat
Innuttaasunit immersorneqarusuttut
Avatangiisinik illersuiniaqatigiiffiup suliniutimini nutaami immikkut ilisimasallit suleqatitillu canadamiut suleqatigalugit Baffinip Kangerliumarngani ajutoornikkut uuliakoortoqassagaluarpat uuliap qanoq siaruaatsiginissaa misissuiffiginiarpaat.
WWF-illu Upernavimmiut tamatumunnga qanoq isumaqarnersut tusarusuppaa.
- Soorunami ajutoornikkut uuliakoortoqarnissaa neriuutiginngilarput, taamatulli pisoqassagaluarpat assersuutigalugu aalisarnermut, piniarnermut pinngortitamullu qanoq kinguneqassanersoq paasissallugu pingaaruteqarpoq.
Tamatumunngalu atatillugu sapinngisamik annertunerpaamik immersorneqarnissarput pisariaqartipparput, WWF-ip Nunatsinnut tunngatillugu suleqatigiivineersoq, Mette Frost, Upernavimmi innuttaasunik ataatsimiititsisussaq taama oqarpoq.
Innuttaasunik ataatsimiititsineq sammisassaqartitsivimmi Illumi nal. 19.30-mit 21.30-imut pissaaq. Ataatsimiititsinermi oqaluttaasoqassaaq aammalu unillatsiarnermi kaffeqarlunilu kaageqarumaarpoq.