Uuliakoorneq misileraatigineqarpoq

Taamatut suliamik ingerlatsinerup inerneri maanna Tromsømi ataatsimeersuarnermi takutinneqarput Oil in Icemik taaguuteqartillugit.

Ilisimatusarnikkut pilersaarut 'Oil in Ice' 2006-imi aallartinneqarpoq tamatumanilu siunertarineqarluni nunat issittut imartaanni uuliamik maqisoornerup qanoq pissuseqartarnerata misissuiffigineqarnissaa. Suliassatut pilersaarummi aamma imartani sikulinni uuliamik maqisoornerup piiarnissaanut periaatsit assigiinngitsut misiligarneqarnissaat siunertaavoq.

Norgemi oqartussaasut akuersissuteqarnerisigut 2006-imili Svalbardip eqqaani nunap issittup imartaani nakkutigisamik uuliamik maqisoortitsisuusaarnerit arlallit pilersinneqartarput.

Uuliap piiarnissaani periaatsit ilaatigut tassaapput uuliap ikuallatsinneqartarnera, akuutissat uuliamik suujunnaarsitsisartut atorneqarnerat kiisalu maskiinat atorlugit uuliap piiarneqartarnera.

Paasisat takutippaat ikuallaasarneq akuutissalluunniit atorlugit suujunnaarsitsisarneq imartani sikulinni piffissartornarnerusoq. Periaatsit aammattaaq imartaq sikoqaraangat uuliamik piiaanermi imaannarmi uuliamik maqisoornernit ilisimaneqartunit piffissartornarnerupput.

Aammattaaq misiligaanerni paasinarsivoq siku pissutsimigut uuliap siammaqqinnissaanik pinngitsoortitsisartoq.

Misileraanertut pilersaarut ilisimatusarfimmit Sintefimit iluanaarniutiginagu siulersorneqarpoq tassaallunilu USA-mi, Canadami Norgemilu ilisimatusarfiit kiisalu uuliasiortitseqatigiit Shellip, Chevronip aamma Statoilip akornanni suleqatigiinneq. Tamanna tassa nunani issittuni uuliakoornermut tunngasumik tamatumunngalu atatillugu pisariaqartinneqartutut piareersimanissamut manna tikillugu nunarsuarmi ilisimatusarnikkut suliniutit annertunersaat.

- Paasisat taakkua atorlugit pitsaanerujussuarmik naliliisinnaalerpugut periaaseq sorleq uuliamik maqisoortoqartillugu atussanerlugu. Tamanna piffissaq pitsaassuserlu aammalu suleqatigiit uuliamik maqisoortoqartillugu piiaasussat eqqarsaatigalugit paasissutissaavoq pingaarutilik, taama oqarpoq pilersaarutinut pisortaq Sintefimeersoq Stein Erik Sørstrøm.

Ataatsimeersuarneq tallimanngorpat naammassissaaq ilisimatusarnikkullu pilersaarummi Oil in Icemit paasisat ullumi saqqummiunneqarlutik.