Uuliakoorneq eqqartuussivimmut suliassanngortinneqarpoq

Uuliakoq 5000 literi Ilulissani sukkalaaliorfimmik pigasaasa eqqaani ukiut marluk matuma siorna imaanut maqinneqarpoq. Suliassaq ukiuni marlunni misissuiffigineqareerluni kiisami eqqartuussivimmi suliarineqartussanngorpoq.
septembarip 09-at 2014 13:19

Qaasuitsup politiiani pisortaq, Gedion Quist, KNR-imut taama ilisimatitsivoq.

Politiimmi Tankeeraq APS, Ilulissat Transportimik piginittoq, Qaasuitsup Eqqartuussivianut ullumi tunniuppaat.

Uuliakumik imaanut maqisineq 2012-mi aggustip qaammataani pivoq. Taamani Ilulissat Transportip takornariartaammit Clipper Adventuremit perusuersartarfinneersorisani assartuumminut maqeriarlugu sukkalaaliorfeertugaata eqqaani imaanut maqippaa.

Gedion Quistip ilanngullugu oqaluttuaraa politiit akiliisitsisoqarnissaanik piumasaqarniartut, taassuma saniatigut Qaasuitsup Kommunia uuliamik saliisitsimanerminut 389.000 koruunik taarsivigineqarnissaminut aamma piumasaqarniarpoq.

Ilulissani sillimaniarnermut upalungaarsimasut uuliakoq 5000 literinit sinneqartoq salippaat. Saliineq sapaatip akunnerata missaanik taamani sivisusseqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq