Uuliakoorfik marullummik immerneqalerpoq

Marullummik atortoqarluni misiliineq iluatsissimanersoq BP-p siusinnerpaamik unnuaru oqaatigisinnaanngussavaa. Kikkut tamarmik iluatsitseqquseqisut BP-p USA-llu præsidentiata Barack Obamap ilungersornerat annertusiartuinnarpoq.

Barack Obama Mexicop kangerliumanersualiarluni aqagu aallassaaq. Tamannalu qularnanngitsumik tulluartuunaviarani BP-p taamaalinerani uuliasiortitseqatigiiffiup uuliap maqisoornera, manna tikillugu minnerpaamik uuliamik 26,5 mio. liiteriusumik imaanut maqisoorfiusoq, iluatsitsilluni unitsissimallugu nalunaarutigissappagu.

Tusagassiorfiit oqaaseqartartullu amerliartuinnartut uuliamik ajutoornersuaq Obamap Catrinaanik taagulerpaat, anorersuarujussuaq præsidentitut siulimi George Buship eqqaamaneqarneranut aseruutaaqataasoq eqqaallugu.

Uuliallu maqisup unitsinniarneranik misiligaanerit kingulliit suli isumalluarnaraluartut, iluatsitsiviulluarnissaat oqaatigissallugu siusippallaarujussuarpoq.

Amerikami sinerissamut nakkutilliisut pisortaata admiral Mary Landry isumalluarpallaanngilaq.

- Maqisoorneq unikaallatsinneqarpat unikaallatsinneqanngippalluunniit uuliamik ajunaarnersuaq kingunerluttussaavoq, Mary Landry oqarpoq.

USA-p kujataanut aallannginnermini præsident Obama præsidentip illorsuani Det Hvide Husimi tusagassiortunik katersortitsivoq. Washingtonimilu tusarfiit oqarput præsidentip ilaatigut imaani itisuumi uuliamik qillerisarnerit, soorlu Mexicop kangerliumanersuani pisut, inerteqqutaanissaat sivitsorniaraa. Uuliasiortitseqatigiit tamatumunnga peqatigitillugu isumannaallisaanikkut piumasaqaatinik sukannernerusunik atugaqalissapput. Qaammatini kingullerni pipallappallaarnerit arlalippassuit paasisoorneqartarput. Kingullermik BP-p aaqqiissutissani marluusuni aaqqiissutissaq nalorninarnerpaaq toqqarsimagaa paasineqarpoq, uuliasiortitseqatigiiffiup qillerineq BP-p maannakkut isumakuluutiginerpaaligaa milinniarlugu misilinniaraluarmagu.

Uppernarsaatissat New York Timesip pissarsiarisimasai naapertorlugit maqisumut militsitsissutissaq aningaasarsiorneq patsisigalugu toqqarneqarsimavoq.

Nutaarsiassaqartitsivik Ritzau naapertorlugu Barack Obamap nunat issittut imartaanni uuliasiorluni qillerisarnissat 2011-p tungaanut kinguartinniarpai.