Uuliaatilissuusaarlutik unammipput

Kina ullualunni uuliaatilissuusaarumassanngila? Teknikkeqarnikkut piginneqatigiiffiusup INUTEK-ip aaqqissugaanik ilinniarnertuunngorniarfimmi ilinniartut uuliaatilissuaasaartillugit sapaatip akunnerani uani unammisippaat.

januaarip 10-at 2008 05:31

Qarasaasiaq atorlugu uuliasiorluni ilisimatusartuusaarluni unammineq ”OilSim Greenland 2008”-mik qulequtserlugu Aatsitassanut Ikummatissanullu Pisortaqarfik aammalu StatoilHydro kiisalu Sulisitsisut Peqatigiiffiat soorunalumi Nuummi Aasiannilu ilinniarnertuunngorniat suleqatigalugit piviusunngortinneqarpoq.

Ilinniarnertuunngorniat internetsi atorlugu unammipput. Iligiikkuutaat marlunnik pingasunilluunniit inuttaqartut uuliasiortuusaarlutik paasiniaatinneqarlutik. Uuliaqarfimmukartuusaartinneqarput sapinngisamillu nalitoorujussuarmik uuliamik gassimillu ujaasitinneqarlutik.

- Kalaallit Nunaanni inuusuttut uuliasiornermik qaammaasaqalernissaat INUTEK-imiit kissaatigisaraarput, taakkuuppummi siunissami uuliamik suliaqalertussaasut. Internetsilu atorlugu unammisitsineq inuusuit akornanni tamatuminnga soqutiginnilernermik pilersitsisinnaavoq, INUTEK-imi siulittaasoq Lone Abrahamsen oqarpoq.

Ajugaasunut akissarsiassaq 5.000 koruuniuvoq, kikkullu ajugaasimanerat Katuami unnugu kalerriutigineqartussaavoq.

Uuliaatilissuusaarlutik unammipput

Aamma atuaruk