Uuliaarluernerujussuaq ernumatitsilerpoq
Qillerinissamut atatillugu akuerisaasimasut uuliaarluertoqalissagaluarpat saliinissaq uuliasiortunit akisussaaffigineqassasoq, Kangilinnguani sakkutooqarfimmi kontraadmiral, Henrik Kudsk ilaatigut oqarpoq.
Uuliaarluertoqartillugu mingutsitsineq pingasunut immikkoortortaqartinneqartarpoq, soorlu Mexicomi uuliaarluerneq annertunerpaamiimmat immikkoortumut 3-mut taaneqarsinnaavoq, immikkoortorlu 1 tassaalluni annikitsumik uuliaarluerneq. Immikkoortoq 2-mi qillerisoqartillugu atortussatigut isumannaarsimasuusarput, Henrik Kudsk assersuuteqarluni oqarpoq.
Kalaallit Nunaata imartaani uuliaarluertoqassagaluarpat tamanna Kangilinnguit sakkortooqarfiata saliinissamut ataqatigiissaarisuulluni isumagisassaraa, tassa sinerissamit 60 sømilit iluanni aamma Canadap Kalaallit Nunaatalu akornatungaa sakkutooqarfiup akisussaaffigaa.
Kalaallit Nunaata imartaani qillerisoqalerpat qilleriniartut isumannaallisaanikkut sakkortuumik piumaffigineqassapput, soorlu qillerisoqassatillugu inuppassuit sulisorineqartarput umiarsuillu qillerutitallit arlallit qulimiguullu atorneqartarlutik.
P1-mi oqallinnermi aatsitassanut naalakkersuisoq, Ove Karl Berthelsen peqataasoq oqarpoq, Amerikami qillerinermut atatillugu piumasaqaatit nunatsinni sakkortunerussasut soorlu aamma Norgemi uuliamik qillerinermi piumasaqaatit sakkortuut malinniarneqartut.
