Uuliaarluernermi akisussaasut appisaluunneqarput
BP-p Mexicop kangerliumarngani uuliamut qillerivissuani qaartoortoqarnerata kingunerisaanik immap naqqanit uulia aniaannaleqqasoq mingutsitseqisorlu pimoorullugu unitsinniaqquneqarpoq.
Uuliarsuaq immap ikerani mingutsitseqisoq - allaat 100 meterisut ititigisumi - imaaliallaannaq qallorneqarsinnaanngilaq.
Uuliap aniaffia ulluni kingullerni mileriarneqartaraluarpoq, sulilu iluatsigani. Ullumi aamma misileeqqittoqassaaq.
Uuliamik qillerivissuaq USA-mi naalagaaffiit ilaata Louisianap avataaniittoq immami 1.500 meterisut ititigisumiittoq Deepwater Horizon sapaatip-akunneri pingasut matuma siornagut qaartoorfiuvoq, taamanerniillu uuliarsuaq aniaannavilerpoq.
Uuliap aniaffia talartiusarsuarmik betoniusumik qallerniarneqartaraluarput torluusaatigut uulia milluarneqarsinnaalerniassammat, sulili iluatsinngilaq.
Imartami ajutoorfiusumi aalisarnermik inuussutissarsiortut kamaqaat, oqarlutik BP susinnaanngitsoq.
Aamma USA-p præsidentia Barack Obama uumitsaqqavoq, oqarluni BP-p neriorsuinini eqquutsillugu inatsisit malillugit mingutsitsisoqartillugu aningaasanik 450 millioni koruuninik taarsiisussaatitaanini eqqaamasariaqaraa, Danmarkip Radioa taama nalunaarpoq.
Uulia aniasoq annaassiniartartut suleqatigiinnerisigut pinngortitallu nammineq killiliineratigut amerikap sineriaani annerusumik mingutsitsinngilaq. Kisianni immap iluani uuliap aniaffiani siaruarfianilu mingutsitsinerup takutippaa, BP-p nalunaarutaanit uulia 50-eriaammik annerusoq suli aniajuarsinnartoq.
