Uulia seqinermit taarserneqarpoq

Seqernup kissaanik tigooraaviup ilaminit anginerusup ikkussornerata naammassinissaa ulluni makkunani utaqqiinnarpaat. Taanna imermik kissaassutaassaaq.

-Naatsorsuutigaarput uuliamik aappaagumiit atuiunnaavinnissarput, Jørgine Frederiksen oqarpoq.

-Tassa angineq imeq kissartumik katersuiffissaq, imeq kissartoq aallartippat atortorissaarutissaa, seqinermik tigooraasussaa, aamma immikkut ikkuttussaavoq. Taava ukua solfangerinik taasagaat sisamat maannakkut atareerput.

Tassa takkua iluaqutigalugit qulliit ukiut aqqaneq-marluk ikissinnaapput elværkeqanngikkaluartik.

-Taakkua ingerlatitsisuupput seqinermut tigooraasui, taava inimi anartarfimmilu aamma atortorissaaruteqarput. Tassani malittarisinnaavarput, sarfaq naammannersoq, sarfakillilernersorluunniit. Immaqa sapaatip akunnera nuiasimaguni siallerluniluunniit elværkeeqqamik akumulatorit taakku sarfalersortarpavut.

Maannakkut tusaasinnaavarput sarfalersuuteeraq, tipaarsaataata silammut aniatitsisua, supoortua, taama nassuiaavoq Jørgine Frederiksen.

Tamarmik ikkussorpata tamarmillu atulerlutik, aamma solfangerit allat marluk aamma atulerpata, taava? aperaarput.

-Taava aappaagumut piareersinnaaguni kiassarneralu kissartuliorneralu, taava tassa uulia atorunnaassavarput, taavalu mingutserineq taamaasilluni unissaaq. Assorujussuaq pitsaassaaq, aamma erinigeqaarput ukiut arlallit utaqqigatsigu, tamakkerluni naammassinissaa.

Jørgine Frederiksenip ajoraluartumik oqaatigisinnaannginnerarpaa aningaasanik qanoq amerlatigisunik sipaagaqarsimanertik.