Uulia nassaarineqartoq ilimagisamit annertuneruvoq

Nunatta imartaani uuliasiornermi nutaarsiassanik nuannersunik suli tusarliuttoqarianngitsoq, Nordsøp Norgemut atasortaani uuliamik annertuumik nassaarneq Norgemi nuannaarutigineqaqaaq.
Allattoq Elisa Isaksen
septembarip 30-at 2011 10:21

1.200 millioninik nappartanut taamani tagginneqartunik uuliamik nassaarsimanertik Statoilip qaammat kingulleq nalunaarutigaa.

Misissueqqinnerilli pereermata, Statoilip oqaluttuarisinnaanngorpaa nassaarineqartoq siullermik eqqoriaanermiit annertunerusoq. Maanna nassaarineqartoq pingajorarterummik annertunerusoq paasineqarpoq, tassami nassaarineqartoq nappartanik 1.800 millioninik imaqartutut nalilerneqarpoq.

Nutaarsiassaqartitsivimmi NTB-mi allaaserineqartut naapertorlugit, Norgep nunavissuarmut atasortaani uuliamik nassaarnerit tallimaasa annersarigaat, qularnanngitsumillu '80-ikkulli qiteqqunneraniit uuliamik nassaarnerit aamma annersarigaat, oqaatigineqarpoq.

Statoil uuliamik nassaarfiusuni marluusuni 40 procentimik piginneqataavoq.