Uulia nappartat 4,9 millionit nalinga maqisimassangatinneqarpoq
Mexicop kangerliumanersuani uuliamik maqisoorneq maannamut nappartanik 4,9 millioninik annertussuseqassangatinneqarpoq. Imaluunniit literinngorlugu uulia 780 million literi maqisimavoq.
aggustip 03-at 2010 05:56
Tamanna uuliasiortitsileqatigiiffiup BP-p amerikamilu oqartussat oqaatigaat.
Uuliali tamarmi imaanut siaruanngilaq. Oqaatigineqartoq malillugu nappartat 800.000-it, tassa 130 million literi qaqinneqarsimavoq. Taamaasilluni uulia aapriilimiilli maangaannartoq nappartanngorlugu 4,1 millioninik annertutigaaq.
Nutaarsiassaqartitsivik AFP malillugu aatsaat taama annertutigisumik uuliamik maqisoortoqarpoq.
Tamatuma siuliani maqisoorneq annerpaajusimagaluartoq aamma Mexicop kangerliumanersuani 1979-mi pivoq. Taamani qillerinermi qaartoortoqarneratigut uuliamik maqisoortoqarmat, nappartat 3,3 millioninik amerlatigisutut uulia nalilik imaanut maqivoq.
