Uulia maqisoq unitsinngitsoorpaat
Amerikap oqaluttuarisaanerani uuliamik mingutsitsinerup sakkortunerpaap unitseriarneqarnera taamaalilluni iliuusissaaleqinartumik iluatsinngitsoorpoq.
BP aamma Amerikami oqartussat oqaatigaat uulia maqisoq unitsinniarlugu periaatsimik allamik misiliiniarlutik, taamaattorli tamatuma misilinnissaanut ikinnerpaamik ullut sisamaniit ullunut arfineq-marlunnut utaqqisoqartariaqartoq.
Ajutoorneq sapaatit akunneri tallimat matuma siornagulli aallartimmalli maannamut minnerpaamik uulia akuiarneqanngitsoq 75 millionit liiteri kangerliumanersuarmi immami maqivoq. Tamanna tamaani ukiorpassuarni avatangiisinut aningaasarsiornikkullu ajutoortitserujussuarsinnaavoq.
Uuliamik maqisumik unitsitseriarnissamut periaaserineqartussaq nutaaq, siusinnerusukkut misilinneqartut allat assigalugit, immami 1500 meterinik itissusilimmi suli misilinneqarsimanngilaq. Maqisumik unitsitseriarnissamut atorneqartussaq, uuliap ilarujussuanik immamut maqisumik tigooraasinnaanissaa neriuutigineqarpoq.
Kisianni immikkut ilisimasallit naliliipput, uulia maqisoq aatsaat nutaamik qillerinikkut unitsinneqarsinnaassasoq, qillerinerlu taanna aatsaat aggusti naalerpat piareerneqarsinnaassaaq.