Uulia maqisoq ukiuni arlalinni nungukkiartuaassaaq

Amerikap præsidentia Obama ippassigami qungujulaqaluni panini peqatigalugu Mexicop Kangerliumanersuani immami nalunnguartoq takuneqarsinnaavoq, matumani uuliamik mingutsitsinerup qaangiunnera, takornariallu ernummateqaratik sissami nalunnguarsinnaanerat takutinniarneqarluni.

Mexicop Kangerliumanersuani uuliasiorluni ajutoornerup kinguneranik uuliap maqisup qanoq annertutigisup aalannguussimaneranik, katersorneqarsimaneranillu Amerikamiut isumalluarpallaarnerarlugit, immamik ilisimatuut oqarput.

Taamaalillutik taakkua Amerikamiut naalakkersuisui akerlilerpaat, taakkumi oqarmata uuliap maqisup affaa ikuallanneqanngikkuni, katersorneqareersoq, salinneqarluni aalannguulluniluunniit.

Kisianni University of Georgiami ilisimatuut allatut isumaqarput. Isumaqaraanni uulia immamut akulerunnermigut peeruttoq ajoqutaajunnaarlunilu, tamanna paatsoorneruvoq, ilisimatuut oqarput.

Uulia maqisoq suli imaaniippoq ukiunilu arlalinni nungukkiartuaaqqaartussaalluni, immamik ilisimatuut oqarput.