Uulia gassilu soqutigineqaqaat
Assiliviit ersarissarneqarput isumaliutersortoqarlunilu nunanit allaneersut tusagassiortut 60-it missaannittut Issittumi siunnersuisooqatigiit ataatsimiinneranni malinnaaneranni. Sammineqartut ilagaat uulia gassilu.
Tuluit tv-qarfiata BBCp immiuppaa oqallittunik aallakaatitassiaq World Debate nunanut allanut ministerit arlallit peqataaffigisaat.
- Ilaatigut oqallisigaarput pisuussutit uumassusillit aamma pisuussutit uumaatsut iluaqutiginiarneranni oqimaaqaatigiissaariniarneq. Soorunami aamma avaqqussinnaanngilarput uuliamik gassimillu ujarlerneq, BBC-meersoq Ross Fitzpatrick taama KNRimut oqarpoq.
World Debate immiunneqarpoq KNR-TV suleqatigalugu taannalu BBC-mi aallakaatinneqassaaq arfininngorneq maajip 22-at.
Russit nutaarsiassaqartitsiviata Itar Tass-ip sammivaa SAR pillugu isumaqatigiissut Nuummi kulturikkut illorsuarmi Katuami atsioqatigiissutigineqartoq sisamanngornermi ualikkut.
Amerikamiut aviisiata Washington Postip uuliasiorneq gassimillu ujarlerneq sammivaa aammalu Qalasersuarmik avannarlermik piginnittuuniunneq sammillugu.
- Allaaserisama aamma ilagaat issittumi ineriartorneq sukkavallaannginnersoq, Washinton Post-imi aviisiliortoq Ross Fitzpatrick oqarpoq. Taassuma sillimaniarnermut apeqqutit sammisarisarpai.
Amerikamiut nutaarsiassaqartitsiviata Bloomberg.comip sammivai uuliasiorneq gassisiornerlu taamatullu atuinerup issittumut kingunerisinnaasai. Tassani tusagassiortup Marianne Stigsenip aamma sammivai suliffeqarfissuit nunanit tamalaaneersut issittumi sunniuteqaleriartornerat.
Franskit aviisiata Le Mondep franskit aallartitaqarfiat apersuiffigisimavaa tassanigooq naammagineqanngimmat Frankrigip Issittumi siunnersuisooqatigiinni toqqaannartumik peqataannginnera.
- Franskit isumaliutigaat issittoq pillugu oqalliffiusinnaasumik pilersitsiniarlutik Issittumi siunnersuisooqatigiit avaqqullugit, tamanna piviusunngortinniarpaat Frankrig toqqaannartumik Issittumi siunnersuisooqatigiinni peqaalersinneqanngippat, Le Mondemi aviisiliortoq Olivier Truc taama oqarpoq.
Nunanit allaneersut tusagassiortoqatini assigalugit uuliasiorneq gassisiornerlu sammisimavai.
