Uulia gassilu inuussutissarsiutaanerpaanngussangatippai

Uuliamik gassimillu qalluineq inuussutissarsiutini pingaarnerpaanut ilaalissasut, Nunatta kissaatigigaa, Naalakkersuisut siulittaasuata, Kuupik Kleistip, issittumi nunat siuttut ataatsimiinneranni, Canadap illoqarfiisa pingaanersaanni Ottawami ippassaq pisumi, tupannarpallaanngitsumik oqaatigaa.
Allattoq Jens Thorin
februaarip 24-at 2011 10:19

- Issittumi pisuussutit nunani allamiut ukiuni hundredelikkaani iluaqutigisimavaat. Inuiaqatigiit Inuit tamakkuninnga iluaqutiginnilernissaat massakkut piffissanngorpoq, Kuupik Kleist oqarpoq tikkuarlugulu, Issittup siunissami allanngornissaani aalisartutut piniartutullu inuussutissarsiorneq naammakkunnaassasoq.

- Qangatut pineq - uninngaannarneq - atorsinnaanngilarput, Kuupik Kleist Canadami, Alaskami Ruslandimilu inuit siuttuinut oqarpoq.

Uuliasiornissaanut, tamatumanngalu peqquteqartumik Issittumi avatangiisit ulorianartorsiortinneqarnerannik, inuppassuit ernumatitaanerat, Kuupik Kleistip nassuerutigaa.

Kisianni taamaakkaluartoq uuliasiornissaq illersorpaa, oqarluni uuliasiorluni qillernerit siornatigornit isumannaannerusut.

Aammali uranitalinnik piiaanngilluinnarnissamik Inatsisartut aalajangigaat Nunatsinnit aalajangiusimaneqartoq oqaatigaa.

- Uagut inuit suna tamaat akigalugu ineriartornissaq kissaatiginngilarput, Kuupik Kleist oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq