Uulia Danmarkimut iluanaarutaallualerpoq
Uuliap akiata qaffasinnera pissutigalugu naalagaaffiup karsia koruuninik milliardilikkaanik Nordsømi uuliasiornermit isaatitsilerpoq.
Naalagaafiup naatsorsuutigaa ukiormannaannaq isertitatik koruuninik 12 milliardinik ilassasut, Jyllands Posten taama allappoq.
Akit taamaaginnassappata ukioq 2015-ip tungaanut isumaqatigiissusiornermi isertitassasut missingersuusiat 2003-meersut 50 milliardinik qummut qaangerneqassangatinneqalerput.
Sinneqartoorutissat taakku aningaasaateqarfiliuunneqarnissaat maanna siunnersutaalerpoq. Arbejderbevægelsens Erhvervsråd Sulisartut inuussutissarsiornermut siunnersuisoqatigiivi siunnersuuteqartuupput.
Aningaasaateqarfiup inuiaqatigiit ilinniarnikkut ilisimatusarnikkullu siuarsarnissaannut atorneqarnissaa anguniarneqarpoq. Aningaasaateqarfik oqaluttuarisaanermut pingaaruteqassaaq.
-Kikkut tamarmik ilinniarnermut, ilisimatusarnermut ineriartortitsinermullu taperneqarumapput. Milliarderpassuit Nordsømi uuliasiornermit sinneqartoorutit atorluarneqarsinnaanngorput. Imaallaat aningaasassaaleqineq oqartussat utoqqatsissutigiunnaassavaat. Siunnersuisoqatigiit sinnerlugit Martin Windelin oqarpoq.