Uulia benzinalu 1 koruunimik akitsussagunarput

Uuliap benzinallu liiterimut akia aasamiit koruunimik ataatsimik qaffaassaq 5 kr 47 øreqalerluni, KNI-p pisortaanera Søren Lennert Mortensen taama nalunaaruteqarpoq.
Allattoq Jaaku Lyberth
marsip 25-at 2011 08:52

Nunarsuarmi tamarmi uuliap akiata piffissami sivisuumi akitsoriartupiloornera nunatsinni aasarumiit sunniuttussanngorpoq. KNI kingullermik uuliamik pisigami, nappartamut ataatsimut 73 dollars-inik akilimmik pisivoq, taanna koruuninngorlugu 384 kr-qarpoq.

Nappartaq ataaseq ullumikkut 113 dollars-inik akeqarpoq, koruuninngorlugu 594 kr-t missaannik akeqalerluni, akitsuut 200 kr-ngajaalluni, KNIp pisortaanera Søren Lennert Mortensen aviisimi Sermitsiami ullumi saqqummersumi issuarneqarpoq.

Kangiani qiterlermi Afrikallu avannaanni eqqiissiviilliortoqarnera uuliap akiata qaffanneranut sunniuteqarpoq. Uuliap benzinallu liiterimut akia 5,47 kr Danmarkimi uuliap benzinallu akiinit appasinnerunera erseqqissarpaa, Danmarkimi uuliap benzinallu liiterimut akia piffissami kingullermi 12 kr-nut akitsorsimammat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq