Uulia aningaasaliisoralugu

Aningaasaateqarfiit marluupput, siullerlu innuttaasut uuliasiornermi sulinermut sungiusarneqarnissaanut aningaasaliisartussaavoq, aappaalu kultoorimut inuusuttullu timersortarnerannut aningaasaliisartuussaalluni.

Aningaasaateqarfinnut qinnuteqartut 20-put, aningaasaliiffigineqartussatullu aaliangiunneqartu aqqanillit atii Cairnip ullumi saqqummiuppai, taakkulu millionit koruunit pingasut agguaattussaavaat.

Ilaatigut Sisimiuni aatsitassarsiornermut ilinniarfiup sulisui tallimat ilinniartitsinerminnut atatillugu pikkorissariartinneqarnissaanut angalatinneqarnissaat aningaasaliiffigineqarpoq.

Aamma Sisimiuni teknikkikkut ilisimatusarfik ARTEK, Kalaallit Nunaanni Sulisitsisut Kattuffiat, kiisalu sanaartortitseqatigiit EMJ-Atcon Greenlandip sulisuisa ineriartortinneqarneranut atugassanik aningaasaliiffigineqarput.

Tamatuma saniatigut inuit ataasiakkaat Cairnip aningaasaateqarfiiniit aningaasaliiffigineqarput, taakkulu uuliasiornermi gassimillu ujaasinermut tunngasunik ilinniartitaaqqinnissaat atugassaanik aningaasaliiffigineqarput.

Suliniutit assigiinngitsut 52-it Kultoorimut aningaasaateqarfimmut qinnuteqartoqarmat suliniutit qulit aningaasaliiffigineqarput, taakkualu 400.000-it agguaatissavaat.

Assammik arsartartut, arsaattartut, nerrivimmi arsaarartartut kiisalu sisorartartut peqatigiiffii suliniutaat assigiinngitsut aningaasaliifigineqarput. Ilaatigut Maniitsumi arsaattartut klubbiata Kâgssagssuup ivigaasanik qallerneqarsimasumik arsaattarfissaat, Ilulissanilu timersorluni sammisassaqartitsivissamut aamma aningaasaliisoqarluni.

Aasianni NIPIAA-Rock Festivali aningaasannatsinneqartunut ilaavoq.