Uulia ajorsisitsivoq
Uuliap akitsoriartornerata Kalaallit Nunaanni tunisat pisiallu oqimaaqatigiinnerat ajorseriartippaa. Kalaallit Nunaanni naatsorsueqqissaartarfiup 2005-imiit maannamuugallartoq kisitsisaataani tamanna erserpoq.
Tunisat pisiallu oqimaaqatigiinneranni koruuninik 1.148 millioninik 2005-mimi amigartoortoqarpoq – ukiumut siulianut naleqqiullugu 161 millionit missaannik ajorseriarluni.
Uuliap eqqussorneqartarnerani aningaasartuutit qaffakkiartornerat Kalaallit Nunaanni naatsorsueqqissaartarfiup ajorseriarnermut pissutaanerarpaa. Avammut tunisinermi aningaasartuutit aamma qaffakkaluartut tamanna iluaqutaanngilaq.
Uuliamik siorna pisinermut Kalaallit Nunaat koruuninik 660 millionit missaannik aningaasartuuteqarpoq, tassa uulia 211 tusind tonsip missaa.
Ukiumut 2004-mut naleqqiullugu annertuneruvallaanngilaq, nunanili tamani niuffannermi akit ineriartornerat 40 procentimik siorna qaffammat tunisat pisiallu oqimaaqatigiinnerannik tamanna ajorsisitsivoq.