Uulia 900 literi suli qaqinneqanngilaq
Sanaartugassanik suliaqartut, Istak, ulluni makkunani misissuileruttorput orsussaq qaqissinnaanerlugu. Aamma ajutoornerup kinguneranik avatangiisit mingutsinneqarneranut misissuinerit inerneri Nukissiorfinnit suli utoqqineqartut, Nukissiorfiit tusagassiisartuat KNR-imut ilisimatitsivoq.
Biili, orsussamik 900 literimik tankimi matoqqasumiitinneqartumik usisoq, Ilulissat avannaatungaani erngup nukinganik nukissiorfiliorfimmi Paakitsup ilorliani, sikukkut assartuitilluni imaanut maajip 15-ani nakkarpoq.
Ajutoorneq KNR-p saqqummiutereeraalu Avatangiisinut Naalakkersuisoq Anthon Frederiksen sakkortuumik qisuariaateqarpoq. Taanna ilaatigut ima tusagassiuutinut allappoq:
- Immap mingutsinneqarnera Naalakkersuisunit akuerineqarsinnaanngilluinnarpoq, ajutoortoqarnera akueriuminaappoq, pingaartumik tankip matoqqasup ikummatissamik 900 literinik imallip kangerluup naqqanut kivineranik kinguneqarmat.
Qamutit assartuutit motoorillit atorneqarneri pillugit nalunaarut nutaaq Nunamut Namminermut, Pinngortitamut Avatangiisinullu Naalakkersuisoqarfiup piareersaleruttorpaa, suliamilu tassani sikumi angallannerup allatut siunissami iluarsiissuteqarfigineqarnissaa ilaatigut ilaatinneqarpoq.
