Uulia 10.000 milliardi koruuninik nalilik
Uulia 10.000 mia. koruuninik nalilik Kalaallit Nunaata avannaaniippoq.
Kalaallit kiffaanngissuseqalernissartik qilanaarilereertariaqarpaat – pingaartumik Danmarkip tapiissutigisartagaanik isumalluuteqarnerujussuup taamaatinnissaanut, taama aviisimi Jyllands-Postenimi allaaserinnittoqarpoq.
Tunup avannaarsuata uuliaqassusianik amerikamiut ujarassiuutut misissuiffiata USGS-p paasiniaanerata takutippaa peqarluartoq, allaallu uulia naturgassilu nappartat 31 milliardit missaanniittoq nassaassaasoq.
Uuliap nappartamut ullumikkut akia malillugu, nappartat 31 milliardit, koruuninngorlugit 10.000 mia. koruuninik naleqarput, qanoq amerlatiginerat assersuusiussagaanni, tassaapput Danmarkimit ukiumut ataatsimoortumik tapiissutaasartut amerlaqatai 3.000-eriarlugit.
Danmarkimi Kalaallit Nunaannilu ujarassiuutut misissuiffimmi GEUS-imi ujarassiooq Flemming G. Christiansen isumaqarpoq, Kalaallit Nunaata uuliasiorfissuanngorsinnaanera ilimanarsiartuinnavissoq.
- Tunup avannaarsuata uuliaqarsinnaanera ilimanarluinnartutut isigaarput, oqarpoq.
Nunarsuarmi uuliaqarfiit pingaarnerit 500-t allattorsimaffianni Tunup avannaarsua nr. 19-itut Amerikamiut USGS-ikkut inissippaat, assersuutigalugu Nordsø, Norgep avataani uuliasiorneq normu 8-tut inissisimavoq.
-Immap naqqani uuliaqassuseq eqqoriaanernit annikinnerussagaluarpalluunniit, amerikamiut misissuinerisa uuliaqarnissaa ilimanarnerulersikkaa, Flemming G. Christiansen Jyllands-Postenimut oqarpoq.
USGS-p naliliinera malillugu, Tunup avannaarsuani uuliap annertussusia, Nordsømi tamarmi uuliaatigineqartup pingajorarterutigaa. Nordsø Danmarkip, Norgep, Tuluit Nunaata, Tysklandip Hollandillu imartaqarfigaat.
