Utøyami toqutaasimasut eqqaaniarneqarput
Norgemilumi ajunaarnersuaq nunat avannarliit ministeriunerisa ullumi oqaluuserineqartuni qulequttat pingaarnersaraat. Tassami nunat avannarliit ilaasortaannut saassussineq Kalaallit Nunaanni inuinnaat oqartussaaqataaneranut aamma saassussineruvoq, Akitsinnguaq Olsen oqarpoq.
- Peqqarniisaarniartarnerli eqqarsaatigalugu Kalaallit Nunaat nunanut allanut sanilliullugu allaanerusumik inissisimavoq, siunnersuisoqatigiinni ilaasortaasup aappaa, Andarias Uldum oqarpoq.
Taanna ullumi Kultureqarnermut Ilinniartitaanermullu ataatsimiititaliami ilaasortaaffigilikkamini ataatsimeeqataasimavoq. Taassuma tassani Kalaallit Nunaata ukiunmi tulliuttuni sunniuteqarnerulernissaa neriuutigaa.
Illuatungaanilli Nunani Avannarlerni Siunnersuisoqatigiit periarfissaqartitsinerata innuttaasunit ilisimaneqarnerulernissaa eqqarsaataasoq, taanna oqarpoq.
Akitsinnguaq Olsen Kim Kielsenimut Naalagaaffiit Peqatigiiffiannut ataatsimiigiarsimasumut sinniisussaavoq. Taanna avatangiisinut pinngortitamilumi pisuussutinut ataatsimiititaliami ilaasortaavoq, ullumilu oqallinnermi ilaatigut issittup imartaani angallannermi sillimaniarnissap annertunerusumik qulakkeerneqarnissaa oqallisigineqarpoq.
Ullumi ataatsimiinneq Bertel Harderimit, danskit naalakkersuisuisa nikinnerisa kingorna Nunani Avannarlerni Siunnersuisoqatigiinni siulittaassunngorlaamit aqunneqarpoq.
Ullumi ataatsimiinnermi Norge-p 2012-mut siulittaasuuffimmik tigusinissaminnut pilersaarutitik aammattaaq saqqummiuppaat.
