Utoqqatserumanngillat
Kalaallit Nunaannut Savalimmiunullu atatillugu FN-imut paasissutissanik kukkusunik tunniussaqarsimanatik nunanut allanut ministerip nalunaarutigereeraa, folketingimut nunatsiniit qinikkat utoqqatsertariaqartut, Atassutip qinigassanngortitaata Jørgen Birger Jensen-ip piumasaqarnera, folketingimut ilaasortap Kuupik Kleist-ip akueriumanngilaa.
- Danskit naalagaaffiata eqqunngitsuliorfigisimavaatigut, oqarlutik, qallunaajungaaratta kalaallinik savalimmiormiunillu immitsinnut taarusunngitsugut. Taamaammat utoqqatsernissamut pissutissaqanngilaq, Kuupik Kleist oqarpoq.
Utoqqatseqqusineq aallaaveqarpoq Kalaallit Nunaat Savalimmiullu pillugit paasissutissat kukkusut Danmarkimit FN-mut saqqummiunneqartarsimanerat nunanut allanut ministerip Per Stig Møllerip ilumuunnginnerareeraalu.
Folketingimi ilaasortaq Kuupik Kleist isumaqarpoq ilisimatuut nalunaarusiamik suliarinnissimasut upperinngitsuusaarneqarsinnaanngitsut, utoqqatseqqusinerlu illuatungaanit pisariaqarsoraa.
- Utoqqatseqqusineq tissinaannarpoq, isumaqarpungalu uagut pinnata Naalagaaffik Savalimmiunut Kalaallit Nunaannullu utoqqatsertariaqartoq, Kuupik Kleist oqarpoq.
