Utoqqatsertoqassanngilaq, nassuiaasoqarsinnaavorli
Taama oqarpoq konservativit Nunatsinnut tunngasunut oqaaseqartartuat Per Ørum Jørgensen, kalaaliaqqat 22-t 1951-imi ilaqutaannit avissaartillugit misiligummik Danmarkimut atuariartortinneqarnerannut tunngatillugu utoqqatsertoqarnissaanik ministeriunerup itigartitsineranut oqaaseqarnermini.
Allattoq Elisa Isaksen
aggustip 20-at 2009 17:05
Konservativit taamaalillutik Venstret aamma Dansk Folkeparti isumaqatigaat, oqarmata pisortatigoortumik utoqqatsertoqartariaqanngitsoq.
Utoqqatsertoqarnissaanik itigartitsigaluarluni, pisimasoq Per Ørum Jørgensenip naakkittaatsuliornertut taavaa.
- Taamaattumik qanorpiaq pisoqarsimanersoq, aamma sooq qanorlu iliortoqarsimanera paasisaqarfigerusupparput. Inuit taakku ilaquttaminnit avissaartinneqartut nassuiaanneqanngisaannarput. Tamatumunnga ilisimasaqalerneq ikiligaanerannut mamisaataasinnaavoq, Konservativit oqaaseqartartuat oqarpoq.
Tamatuma akerlianik Socialdemokratit utoqqatsertoqarnissaa misissuisitsisoqarnissaalu isumaqatigalugit siusinnerusukkut nalunaarutigereerpaat.
