Utoqqartavut nakkutigineqanngitsumik nakorsaasersorneqarput
Inuit Ataqatigiinneersoq Johan Lund Olsen oqarpoq, utoqqaat illuini nakorsaasersuisarneq pillugu nassuiaat ilungersunartoq Inatsisartut ataasinngormat aatsaat takugaat. Taamaaliornerlu Johan Lund Olsen-ip isumaa malillugu Inatsisartut malittarisassaannik unioqqutitsineruvoq, nassuiaat naalakkersuisoqarfimmi septembarip 25-ani naammassineqarsimammat, Inatsisartunullu ataasinngormat oktobarip 13-ani aatsaat aguaanneqarmmat.
- Nassuiaat uissuumminaqisunik uulikullannartunillu paasissutissiivoq, pingaarnertut oqaatigineqarmat, malittarisassat malinnagit utoqqarnik nakorsaasersuisoqartoq, malittarisassallu sukaterluinnarneqartariaqartut. Taamaattumik suliaq una imaannaanngeqaaq, Johan Lund Olsen oqarpoq.
Utoqqaat illuini nakorsaasersuisarneq upernaaq siullermeerneqarpoq. Johan Lund Olsen-illu unnerpaa, naalakkersuisoq Inatsisartunik eqqissisaasoq, malittarisassat allanngortinnissaannut pissutissaqannginneraalluni.
- Oqarpoq, ”utoqqaat pitsaasumik isumagineqarput, isumassorneqarput, utoqqaat iluini nakorsaasersorneqarput”. Uffali sunaafa taamaanngitsoq. Naalakkersuisunut ilaasortat uninngatitsivoq, naak pissutsit paasigamigit septembarip 25-anili erngerluni tunniutussaagaluarlugit. Inatsisartut qoqassinneqarput, taannalu akuersaarneqarsinnaanngilaq, Inatsisartunut ilaasortaq Johan Lund Olsen oqarpoq.
Ilaqutariinnermut naalakkersuisoq, Arkalo Abvelsen Inatsisartut oqaluttarfianniit nassuerpoq, ajuusaarpoq, utoqqarnik nakorsaasersuisarneq pillugu nalunaarusiaq paasissutissanik pingaaruteqartunik imalik saqqummiussinngitsoorsimagami. Tamanna siunertarisimanagu oqarpoq.
