Utoqqarnut politikkeqartoqarpianngilaq

Nunatsinni kommunerpassuarni taamaallaat Sisimiut Aasiaallu kisimik utoqqarnut politikkeqarput.

Utoqqaallu nipaat isumaqarpoq kommunit tamarmik utoqqarnut politikkeqartariaqartut, tamannalu Kanukoka-p suliarisariaqaraa.

Utoqqaat Nipaanni siulittaasoq Magnus Therkelsen ima oqarpoq:

- Kanukokamut saaffiginnippugut, imatut nipilimmik, kommunit tamarmik utoqqarnut polikkeqartariaqartut, akivaatigut saaffiginnissuterput tigulluaritsik, ukiorlu naatinnagu iliuuseqarfigineqassasoq, taama oqarpoq nuna tamakkerlugu utoqqaat nipaanni siulittaasoq Magnus Therkelsen. Taanna nassuiaavoq, utoqqarnut politikkeqarfiusuni, tassalu Sisimiuni Aasiannilu utoqqaat sullinneqarnerat pitsaanerusoq ilaatigut utoqqarnut siunnersuisooqatigiinnik pilersitsiffiullutik. Siunnersuisooqatigiillu kommunini inunnik isumaginnittoqarfik suleqatigalugu utoqqaat atugaat pillugit oqaloqatigiittarput taamaalillutillu kommuniminnut siunnersuutaat ingerlateqqinneqartarlutik.

- Utoqqarnut politikkeqartoqarusunnera tamaat taperserparput, kisianni kaammattuiinnarsinnaavugut, kommunimmi politikkeqarusunnerlutik namminneq aalajangigassaraat, Kanukokap siulittaasorigallagaa Knud Kristiansen oqarpoq.

- Qanormi kaammattueriaaseqarpisi?

- Atorfilittagut attavigineqarsinnaapput, aamma kommuniniit nalornissutigineqarpat politikkip oqaasertassai qanoq issanersut taava Kanukokamiit siunnersorneqarsinnaapput, akivoq.

- Kommunit utoqqarnut politikkeqarusukkunik qaqugu politikkissartik naammasisariaqaraluarpaat?

- Oqaannarsinnaavunga neriukkaluarpugut tamanna aallartipallassagaat, kisianni kommuninut naalakkiisinnaanngilagut taamaallaat kaammattuuteqaannarsinnaavugut, Kanukokami siulittaasumut tullersortaasoq Knud Kristiansen taama oqarpoq.