Utoqqaq napparsimasoq pisortanit ikiorneqarsinnaanngitsoq
- Kipiluttunaqaaq, taamannak toqujartortunik isiginaarluni akuersaarnanngilaq. Heidi Møller oqarpoq.
- Uagutsinnut sakkortuvoq, sunaaffa ikiortissaaleqilluni taama ajortigisoq. Sanngiilliartornera isigalugu sakkortoqaaq, qitornaasugummi ilisimannginnatsigit suut pisariaqartinnerai suullu eqqumaffigisarianersut, Heidi Møller anaanami ikiorserneqarnissaanut ilungersornini pillugu taama oqarpoq.
Heidip arnaa puammigut kræfteqarsoralugu Nuummi Dronning Ingridip Napparsimmavissuani ukioq misissortikkiartortinneqarpoq.
Taamatut misissortikkiartornini sakkortuumik atorpaa utoqqarmullu pitsorlunnini pissutigalugu misissorneqaqqinnissani kissaatigisimanagu.
Qaqortumi maanna angerlarsimaffimmini kisimiilluni najugaqarpoq, kommunimit atortorissaarutitigut ikiorserneqartarpoq najorneqartarlunilu.
- Kommunip tungaaninngaanniit neqeroorutit imaapput, qulininngaaniit ullup´qeqqata tungaanut najorneqartassasoq, tassa kisimi, Heidi Møller oqarpoq.
Kommuni Kujallermi isumaginninnermut pisortap Martha Lund Olsenip inunnut ataasiakkaanut tunngasut oqaaseqarfigisinnaanagit KNR-imut allakkamini nassuiaavoq, erseqqissaatigaalu utoqqaat angerlarsimaffiat maanna ulikkaaqqasoq. Inissaqaleraagallu inissamik innersuussisartut tulleriaarinerat malinneqartartoq.
Heidip arnaa nakorsaatissaminik napparsimavimmit tunineqartarpoq uninngasuutigineqanngilarli.
- Silaarutissappat aatsaat, ikiortariaqavippat aatsaat. Qisuariarsinnaanngillat iluamik. Timaata tarajoqassusaa ajortikkaagat napparsimavimmut aatsaat unitsittarpaat, Heidi Møller oqarpoq.
Heidi qatanngutinilu sapinngisartik tamaat anaanaminnik paaqqutarinnillutillu ikiuukkaluarput, kisianni aamma suliffinnik ilaquttanillu isumagisassaqaramik anaanami ikiorneqarnissaat pisariaqartippaat.
- Tassa kipiluttunaqaaq. Taamannak toqujartortunut isiginnaartuulluni akuersaarnanngilaq, Heidi Møller oqarpoq.
Qaqortumi napparsimavimmit suliaq pillugu oqaaseqartitsisinnaasimanngilagut.