Utoqqaq ilinniagartooq 13-issaa soraarummeertoq

Taanna ilinniagartuutut 13-issaa soraarummeeqqammersoq, spaniamiut aviisiisa ilaanni El Mundomi allaaserinnittoqarpoq.

José Luis filosofitut 19-inik ukioqarluni naammassinnippoq, humanioramillu maanna naammassinneqammerluni.

Suliffeqarnermut inatsisit, geografii, oqaluttuarisaaneq, tuluttut, franskisut, tyskisut, spanskisut, hebræerisullu ilinniarsimasuuvoq, kiisalu filologiimik, tassa inuiaat oqaasiinik ilisimatusarsimallunilu nakorsatut naammassinnissimalluni.

-Nalunaaquttap akunneri sisamaannaat sinittarpunga, atuagassannut piffissaqarniassagama, José Luis oqarpoq. Eqqartuussisuserisutut, aningaaserivimmilu atorfilittut taanna sulinikuuvoq, universitetinilu arlaqartuni ilinniartitsisuusarsimalluni.

-Inatsisilerituutut ilinniarpunga ataatama taama peqqummanga, humanioramilli soqutigisaqarneruvunga, ilinniagartooq oqarpoq, nangipporlu:

- Ililsimasaqarnerugaanni paasinarsisarpoq ilinniagassarpassuaqartoq, 82-inik ukiulik, 13-issaalu ilinniagartuunngoqqammersoq, oqarpoq.