Utoqqalinersiutisiallit qinnuuloortutut misigisimasarput
Tamanna Nuummi Utoqqaat peqatigiiffiata siulittaasuata Ole Magnussen-ip akueriuminaatsippaa.
Nunarsuaq tamakkerlugu utoqqaat ulluat malunnartillugu Nuummi utoqqaat innarluutillillu ornittagaanni Ippiarsummi utoqqaat katerisimaarput aliikkusersuinertalimmik.
Ole Magnussen ima oqarpoq:
- Aappannut qinnuuloortutut imminut isigilissaanga, aapparalu ilungersorluni sulissaaq akiligassat akilerniassallugit, Ole Magnussen oqarpoq.
Aappaasup isertai apeqqutaatinnagut utoqqalinersiat aaqqinneqartariaqartut Ole isumaqarpoq, taamaaliornikkut inuiaqatigiinni naligiissumik utoqqalinersiat ingerlanneqassammata, tamannalu akissaqatinneqartariaqartoq oqarluni.
Aappariit Jonas aamma Julie Møller tamarmik utoqqalinersiuteqartut utoqqalinersisalernertik ukiut sisamat matuma siorna aallartimmat aningaasatigut annikilliorput, tapiissutitut periarfissat ilisimannginnamikkit.
Jonas Møller nulianilu Julie Møller utoqqalinersisaleqqaaramik nikingaarsoortarsimapput. Inigisaminnut akiliutaat annertusimavoq tamatumalu kinguneranik qaammammut aningaasataat annikitsuararsuusarsimallutik ilaatigut qaammammut 100 kr naammatsinniartarsimallugu.
Maannakkut aningaasatigut atugaat ajunnginnerulerput, utoqqalinersiallit aningaasatigut tapiiffigineqarnissamik periarfissaat paasigamikkit.
Jonas aamma Julie Møller ukioq 2004-imili mikinerusumik initaarniarlutik paarlaateqatissarsiortuaraluarput ukiumut 50 korooruneertarlutik sulili iluatitsinatik.
