Utoqqalinersiutinut aningaasaliissutissat suli nassaarineqanngillat
Ilaqutariinnermut naalakkersuisoq, Aleqa Hammond, Itisiliinermi ippassaq unnukkut aallakaatinneqartumi oqarpoq, utoqqalinersiutillit 3500-it missaanniittut pensionisiaasa iluarsaaffigineqarneranni aningaasaliissutissat suli nassaarineqanngitsut. Tamatumunnga 53 millioni koruunit amigaatigineqarput.
Akileraarutit qaffanneqarsinnaasut, Aleqa Hammnond-ip eqqaavaa.
- Kisianni periarfissat allat aamma eqqarsaatigineqarsinnaapput, naalakkersuisunut ilaasortaq oqarpoq.
Ilaqutariinnermut ataatsimiititaliami siulittaasoq , Olga P. Berthelsen, Itisiliinermi peqataasoq erseqqissaavoq, akileraarutinik qaffaanissamik Inuit Ataqatigiit eqqarsaateqanngitsut.
- Periarfissanik allanik ujarleqataasinnaavugut. Aamma inummut tapinik sukaterissamik Naalakkersuisut siunnersuutaat, Ilaqutaariinnermut Ataatsimiisitaliami oqaloqatigiissutigineqaqqissasoq, Olga P. Berthelsen oqarpoq.
Utoqqalinermi pensionit pillugit inatsisissaq, juulip aallaqqaataani atuutilertussatut saqqummiunneqartoq, Inatsisartut upernaaq manna ataatsimiinneranni akuersissutigineqassasoq naatsorsuutigineqarpoq.