Utoqqalinersiutillit atugarissaarnerulernissaat siunnersuutigineqarpoq

Utoqqalinersiallit nunatsinni sumiiffinni arlalinni ukiarmi akerliussutsimik takutitsisarnerat maanna kinguneqalerunarpoq, Inatsisartut nutaamik peqqussusiulerunarmata.

Tamatuma kingunerissagunarpaa utoqqalinersiallit aningaasatigut atugarissaarnerulernissaat, utoqqalinersiutit taamaalillutik akinut siunissami aamma malinnaasinnaalissallutik.

Ilaqutariinnermut Naalakkersuisup, Aleqa Hammondip, peqqussutissaq ippassaq saqqummiuppaa, utoqqalinersiutit amerlineqarnisaat peqqussummi allassimavoq, ukiullu soraarninngorfissat 63-iniit 65-inut allanngortinneqarput. Utoqqalinersianut ajoqutaanngitsumik saniatigut aamma akissarsiortoqarsinnaalernissaa peqqussummi allassimavoq.

Siunnersuut naapertorlugu utoqqalinersiat kisimiittunut 90.000 koruuniniit 110.000 koruuninut qaffanneqassapput, aappariinnut 133.000 koruuniniit 150.000 koruuninut qaffanneqassallutik.

Innaallagissamut, imermut kiassarnermullu kommunit utoqqalinersiutilinnut tapiisarnerat siunnersuummit eqqorneqassaaq, tassa taanna annikillissagami. Tapiiffigineqarsinnaasussalli tassaassapput, isaruartaarniarneq ikiuutissallu allat.