Utoqqalinersiat Inatsisartunit aqagu oqaluuserineqassapput

Inatsisartut aqagu ataatsimiinneranni ilaatigut utaqqalinersiuteqartarnermut tunngasut eqqartorneqassapput.

Nuummi Utoqqaat Peqatigiiffianni siulittaasoq Ole Magnussen oqarpoq utoqqalinersiuteqartut atugarisaat akuerineqarsinnaangilluinnartoq.

- Soorunami utoqqaat atugarisaat pillugit pitsanngorsaasoqarniarpat nuannaarutigissavara, maannakkummi utoqqaat aningaasatigut atugarisaat akuersaarneqarsinnaangilluinnarmat, Ole Magnussen oqarpoq.

- Aapparisap isertitai apeqqutaatikkunnaarlugit assigiimmik pineqarnissaat, tassami aapparisaq 160.000-imik isertitaqarsimappat taakku allaavigalugit naatsorsuisarnerup kingunerisarpaa qaammammut 2.000 koruunit inorlugit inuuniartariaqartarneq artornartuuvoq.

Ole Magnussen oqarpoq assut utoqqaat atugarisaannut pitsanngorsaataasinnaasunik siunnersuutit Inatsisartunit akuerineqassangikkaluarpat assut ajuusarutigissallugu:

- Utooqqaat atugarisaat Inatsisartunut Kommunalbestyrelsimullu qinersisoqartillugu eqqartorneqartuarput, kisianni minnerpaamilluunnit akit qaffakkiartornerannut naapertuuttumik aningaasaqarnitsigut aaqqiisoqarneq ajorpoq, tamannalu akuersaaruminaatsorujussuuvoq, Ole Magnussen oqarpoq.

Utoqqalinersiutillit, siusinaartumik sulisinnaajunnaarsiutillit kiisalu innarluutillit aningaasatigut pitsanngorsaavigineqarnissaannut siunnersuuteqartuupput Anthon Frederiksen, Kattusseqatigiit Partiiat, Astrid Fleicher Rex, Demokraatiniit kiisalu Ruth Heilmann, Siumut.