Utoqqalinersiallit qaffaataat iluaqutaanngilaq

Kalaallit Nunaanni utoqqalinersiallit ukiup ataatsip matuma siorna neriorsuiffigineqaraluarput utoqqalinersiutiminnik qaffaavigineqarnissaannik. Tamannalu utoqqalinersiutilippassuarnit qiimmaallaatigineqarsimaqaaq.

Kommunenili arlalinni utoqqaat inigisaasa tapiiffigineqartarnerannik maanna ilanngaavigineqartarput.

- Kingullertigut utoqqarpassuarnit naammagittaalliortunit saaffigineqartuartarpunga. Ajoraluartumillu utoqqarpassuit allaat 11 procentip tungaanut inigisaminnik tapiiffigineqartarnermikkut ilanngaavigineqartarsimapput, taama oqarpoq IA sinnerlugu Inatsisartuni ilaasortaq Esmar Bergstrøm. Taassuma utoqqalinersiat taama aaqqinneqarsimanerat Inatsisartuni ullumi oqallisissiaraa.

- Ajoraluartumillu kommunit arlallit utoqqaat ajunngitsorsiassatut tapisiaqarnerannik ikiorsersinnaaneq ajorpaat. Qalleqqillugulu inigisamut tapinik piiaaffigineqartarlutik, taakkulu qaavatigut aamma innaallagissamut imermullu akiliisariaqartarput. Taamaattumik Inatsisartuni siunnersuutigaara kommunit tamarmik assigiimmik ajunngitsorsiassaqartitsisariaqartut, taamatuttaaq aamma inigisamut tapiissutinut malittarisassat allanngortinneqartariaqartut, taama Inatsisartuni ullumi oqarpoq Esmar Bergstrøm.