Utoqqaat timigissarnermut pikkorissartut
Utoqqaat 19-it sinerissami utoqqaat peqatigiiffianneersut Nuummi qanittukkut pikkorissartinneqarmata ajaappialerluni pisunneq, timersorneq siaarsarnerlu sammisanut ilaapput.
Allattoq Louise M. Kleemann
juunip 07-at 2011 08:31
Pikkorissarneq ullunik sisamanik sivisussuseqartoq utoqqaat peqatigiiffiinit Timersoqatigiillu Kattuffiannit aaqqissuunneqarpoq. Utoqqaat peqataasut 19-it utoqqaat peqatigiiffiinit qulininngaanneersut pikkorissarput.
Peqatigiiffiit peqataatitaqartut tassaapput Naangisat Nanortalimmiit, Qaqqaaraliaq Qaqortumiit, Arpaligaat Narsamiit, Qiimaallugu Paamiuniit, Qeersaat Nuummiit, Paarnguliaq Maniitsumiit, Eqartoq Sisimiuniit, Oqilaatsoq Aasiaanniit, Pequi Qasigiannguaniit, Uvaasoq Ilulissaniit aamma Minngaatsoq Qeqertarsuarmiit.
Pikkorissarnermi sammineqartut tassaapput ajaappialerluni pisunneq, siaarsarneq, perorsaaneq, timersornermut tunngasunik sammisaqarneq, sungiusarnermut piareersarneq aamma utoqqalinermi timip allanngortarnera.
