Utoqqaat timersortartut nuna tamakkerlugu unammiuaartut

Aasiaat sinerissami utoqqaat siusinaartumillu sulisinnaajunnaarnersiutillit peqatigiiffiini ilaasortanit 218-inik ikinnerunngitsunit ulluni makkunani titeraartoqarpoq, illup iluani timersuutit marluk atorlugit unammersuarnissami sapaatip akunnerani 29-mi peqataajartorlutik aggertunit.

Utoqqaat siusinaartumillu sulisinnaajunnaarnersiutillit ukioq allortarlugu timersoqatigiittarlutik Bendt Søholm, Aasianni utoqqaat siusinaartumillu sulisinnaajunnaarnersiutillit peqatigiiffianni Oqilaatsumi siulittaasoq oqarpoq.

- Sapaatiummat Avannaata Ilinniarnertuunngorniarfiani ullaakkorsioqatigiittoqarpoq ualikkullu Egedep Oqaluffiani naalagiaqatigeereernerup kingorna peqatigiiffiit katinngatilisaarlutik Aasiaat Timersortarfissuannut ingerlaaqatigiipput tassanilu unammiuaarnissat ammarneqarput. Unammiuaarnissami 250-init ikinnerunngitsut peqataassapput. Bendt Søholm, Oqilaatsumi siulittaasoq, nassuiaavoq.

Sinerissami utoqqaat siusinaartumillu sulisinnaajunnaarnersiutillit peqatigiiffiisa unammiuaartinneqarnerat Aasiaat Timersortarfianni juulip 12-iannit 19-iannut ingerlanneqarpoq, timersuutigineqarlutik assamik arsarneq ball hockey-millu taaneqartartoq.

Ball hockey-mik taaneqartartoq marlunngornermi unammissutigineqarpoq. Uani Eqartoq, Sisimiut, aamma Uvaasoq hold 3, Ilulissat, unammipput; 0-0. Assi © : Jens Rafaelsen

Unamminerit sivikitsunnguusarput

Ball hockey-mi unamminerit tamarmik muminnissap tungaanut 5 minutsinik sivisussusilinnik ingerlanneqartarput, assammilli arsarnermi muminnissap tungaanut 10 minutsikkaarlugit ingerlanneqarlutik. Unamminerillu sivisussusissaat KNUSTAS-imit (Kalaallit Nunaanni Utoqqaat Sulisinnaajunnaarnersiutillillu Timersortartut Ataatsimut
Suleqatigiiffiat) ataatsimeersuarnermi aalajangersarneqarsimasoq, Aasianni utoqqaat siusinaartumillu sulisinnaajunnaarsiutillit timersoqatigiiffianni Oqilaatsumi siulittaasoq, Bendt Søholm, oqarpoq.