Utoqqaat Sulisartut Højskolianni

Utoqqaat 36-it Danmarkimi Pensionisternes Samvirke-meersut, suliunnaarnersiuteqalersimasut pensionistit Sulisartut Højskoliani, Qaqortumi, ulluni makkunani tikeraartigineqarput.

Danmarkimeersut Qaqortumut tikeraat nuannaarutigineqartaqaat.

-Tikikkaangata utoqqaat nunaqqativut qaaqqusarpavut. Ila, nuannaartaqaat. Nutserisoqanngikkaluarlutik imminnut paaseqatigiilluartarput, Sulisartut Højskoleani pisortaq Kaj Lyberth nassuiaavoq.

Utoqqarnik naapeqatigiissitsinerup saniatigut, Qaqortup eqqaa takornariartinneqartarpoq. Aamma arnaq kalaallisuuliortartoq tikeraat pulaartarpaat, soorluttaaq kulturit akimorlugit unnussioqatigiinnerit oqalugiarnertallit erinarsoqatigiinnertallillu nuannisartitsisaqisut. Kaj Lyberth oqarpoq.

Aamma ilisimatitsissutigaa utoqqaat allat aggustimi tikittussaasut.

Pensionisternes Samvirke-p suleqatiginerata saniatigut, utoqqasaajunerusunik angalatitsisartoq Nordic Adventure Københavnimiittoq aasaanerani Sulisartut Højskole-liartitsisarpoq.

-Ukiut tamaasa maajimiit septembari ilanngullugu takornarianik sullitaqartarnerput ileqqunnguussimavoq. Utoqqaannaanngitsut aammali takornariat allat, soorlu Slesvig kujallermeersut Qaqortoq eqqaalu takornariarlugit tikissapput. Kaj Lyberth nangippoq, oqarluni naatsorsuutigigitsik aasaq manna takornariat 200-t missaaniittut tikissasut.

Aasaanerani takornariartitsisarneq Højskolemut koruunit millionit affaangajaannik (500.000 koruunit missaannik) siorna isertitsissutaasimavoq, taakkulu aningaasartuutinut matussuseeqataasimapput.

Namminersornerullutik Oqartussat Sulisartut højskoleannut tapiissutai ukiumut 5,3 mio. koruuniupput, inuit 1.000-t højskolemik ukiup ingerlanerani atuisartunut aningaasartuutinut ingerlatsinermullu matussusiineq ajortut, taamaammat højskolep takornarianit atorluarneqarnera iluaqutaalluartartoq, Kaj Lyberth erseqqissaavoq.